Жейк Пол Майк Тайсоныг ялсныхаа дараа өөрийн дараагийн "мөнгө олох тулаан"-даа бэлэн болсон байна. Энэ удаад тэрээр мөн л ахимаг насны, тэтгэвэртээ гарсан өрсөлдөгчийг сонгосон нь гайхах зүйл биш юм.
Өнгөрсөн бямба гарагт, 58 настай хүнд жингийн дэлхийн аварга асан Майк Тайсоныг шүүгчдийн санал нэгтэй шийдвэрээр ялсныхаа дараахан Пол 36 настай UFC-ийн аварга Конор МакГрегорыг дуэлд дуудлаа. Гэхдээ тэр энэ удаа боксын тулаан хийхийг хүссэнгүй. Түүний хүсэл нь MMA тулаан байв.
27 настай, "YouTube"-ээс боксын ертөнцөд хөл тавьсан Жейк Пол “X” платформ дээр: “Хүндэт Конор, чи миний багт 170 фунт жинд тулалдана гэж хэлсэн. Гэхдээ тэр бол хэзээ ч биелэхгүй зүйл. Үүний оронд MMA тулаан хийцгээе. Жин хязгааргүй, хуучны адил хийгддэг байсан шигээ. Гэхдээ чи зориглохгүй” гэж бичжээ.
МакГрегор, мэдээж нийгмийн сүлжээнд тархсан мемүүдийг анзаарсан бололтой, өөрийн хариу зурвасаар, хоржоонтой байдлаар хариулсан юм.
МакГрегор “Накиса надад аль хэдийн утасдсан, нөхөр минь, дараагийн тулаанд энэ залуу чамайг хүлээж байна. Амжилт хүсье, найз минь” гэж бичсэн бөгөөд үүнийхээ хамт 82 настай Сенатор Митч МакКоннеллийн зураг оруулжээ.
Жейк Полын "шүтэн бишрэгчид" түүний дараагийн өрсөлдөгчийг Клинт Иствуд, Ерөнхийлөгч асан Жимми Картер, Роберт Де Ниро (тэрээр "Raging Bull" кинонд боксчны дүр бүтээж Оскар хүртсэн) зэрэг хүмүүс байх ёстой гэж шоглон санал болгожээ.
Энэ хооронд, Жейк Пол өөрийн орлогоо тооцоолж, Тайсонтой хийсэн тулаанаас ойролцоогоор 40 сая ам.доллар олсноо мэдэгдэж, өөрийн "Most Valuable Promotions" компанийн амжилтыг магтаж байна. Тус компани Netflix-тэй гэрээ байгуулснаар стриминг үйлчилгээнд 60 сая хэрэглэгчийг татахад хувь нэмэр оруулжээ.
Эх сурвалж: USA TODAY
