Үндэсний бөхийн холбооноос 2025 оны хоёрдугаар сард зохион байгуулахаар товлосон барилдаануудын хуваарийг зарлалаа.

Энэ сард сар шинийн баярт зориулсан цуврал барилдаанууд явагдах бөгөөд тодруулбал өсвөрийн бөхчүүдийнх 2-р сарын 20-ны өдөр, сумын цолтнуудынх 2-р сарын 24-ны өдөр, аймаг цэргийн цолтнуудынх 2-р сарын 25-ны өдөр болохоор товлогджээ. Эдгээр барилдаанууд тухайн өдрийнхөө 11:00 цагаас эхэлнэ.

Тэгвэл 2-р сарын 26-ны өдөр аймаг, цэрэг болон сумын цолтой 800 бөх барилдуулж, хоёр давсан 200 бөхийг шигшин битүүний өдрийн барилдаанд оролцуулах юм.

Харин 2-р сарын 27, 28-нд 13:00 цагаас Могой жилийн сар шинийн баярт зориулсан 256 бөхийн барилдаантай. Эхний өдөр 1, 2-ын даваа явагдах учиртай.

Эдгээр барилдаанаас наана улс, аймгийн цолтой 128 бөхийн гурван барилдаан, сумын цолтнуудын нэг барилдаан болно.

2-р сарын 2-ны өдөр 11:00 цагаас Хавдрын эсрэг зөвлөлийн нэрэмжит сумын цолтой бөхчүүдийн барилдаантай.

Тэгвэл 2-р сарын 8-ны өдөр Архангай аймгийн Эрдэнэмандал сумын 100 жилийн ойд зориулсан, 2-р сарын 9-ны өдөр Баянзүрх хайрханы хишиг, 2-р сарын 15-ны өдөр Дорнод аймгийн Цагаан-Овоо сумын 100 жилийн ойд зориулсан улс, аймгийн цолтой тус бүр 128 бөхийн барилдаан болохоор товлогджээ.

У.Чинзориг